Tekereza wicaye mu modoka ujya ku kazi, ariko nta muntu uri kuri steering. Wowe winjizamo aho ushaka kujya, imodoka ikagenda, igahagarara ku itara, ikirinda abanyamaguru n’izindi modoka.

Birasa na film, ariko ahantu hamwe ku isi ibi byatangiye kuba ukuri.

Twabanje kubibona mu ndege

Muri iki gihe, indege nyinshi zigezweho zifite autopilot ishobora gufasha mu kugumana inzira, altitude n’umuvuduko. Ariko nubwo indege ishobora gukora igice kinini cy’urugendo yifashishije automation, abapilot baracyakenewe kugira ngo bakurikirane indege kandi bafate ibyemezo igihe bibaye ngombwa.

Ibi bitwereka ko automation ishobora gufata imirimo myinshi, ariko umuntu agakomeza kugira uruhare rukomeye.

None se imodoka zishobora kugera ku rwego rutuma umushoferi atagikenewe?

Byatangiye kuba ukuri

Waymo ni imwe mu masosiyete ari imbere muri uru rugendo. Kugeza muri Werurwe 2026, yatangaje ko imodoka zayo zari zimaze gukora ibirometero birenga miliyoni 220 mu ngendo nta muntu uyoboye.

Imodoka zayo zikoresha cameras, lidar na radar kugira ngo zimenye ibiri hafi yazo, harimo imodoka, abanyamaguru n’ibindi bintu biri mu muhanda.

Icy’ingenzi ni uko izi modoka zitagendera ahantu hafunze gusa. Ziri kugenda mu mihanda nyayo, mu traffic nyayo, zitwaye abantu nyabo.

Ariko “self-driving” ntabwo buri gihe bivuze kimwe

Aha ni ho abantu benshi bashobora kwibeshya.

Urugero, Tesla Full Self-Driving (Supervised) iracyasaba ko umushoferi yitegura gufata control igihe icyo ari cyo cyose. Ntabwo ari imodoka igenda yonyine burundu.

Ibi bitandukanye na robotaxi nka Waymo ikorera mu duce twemewe nta muntu uri ku ntebe y’umushoferi.

Ni ukuvuga ko hari urwego rutandukanye rwa automation.

Ese biruta umuntu utwaye?

Waymo yatangaje ko mu isesengura ryayo ry’ibirometero birenga miliyoni 220, imodoka zayo zagize impanuka nke zatezaga gukomereka bikomeye cyangwa urupfu ugereranyije n’abashoferi mu duce yakoreragamo.

Ibi birashimishije, ariko ni ngombwa kumenya ko ayo ari amakuru yatangajwe na Waymo ishingiye ku isesengura ryayo. Ntabwo bivuze ko buri modoka yigenga ku isi yamaze kurusha umuntu mu mutekano.

None se abashoferi bazabura akazi?

Iki ni cyo kibazo gikomeye.

Niba robotaxi zikwira hose, taxi drivers n’abandi batwara abantu bashobora kubona akazi kabo gahindutse. Ariko bishobora no kuvamo indi mirimo ijyanye no gucunga izi modoka, kuzisana, gukurikirana fleet no kubaka technology izikoresha.

Kandi ntabwo imodoka zisanzwe zigiye kubura ejo.

Birashoboka cyane ko mu gihe kizaza tuzabona imodoka zisanzwe zitwarwa n’abantu, izifashwa cyane na automation, ndetse n’izitwara zonyine.

Afurika yo izabigenza ite?

Ibi ni byo bishimishije kuri twe.

Robotaxi ikora neza muri San Francisco ntabwo bivuze ko ishobora guhita ikora neza i Kigali. Imihanda, traffic, moto, abanyamaguru, ibimenyetso n’amategeko biratandukanye.

Ni yo mpamvu technology nk’iyi igomba kwigishwa no kugeragezwa ku buryo bujyanye n’umujyi cyangwa igihugu igiye gukoreramo.

None se igihe cyo gutwara imodoka kirangiye?

Oya. Ariko kiri guhinduka.

Nk’uko autopilot itatumye indege zose zivanaho abapilot, n’imodoka zitagira driver ntabwo bivuze ko buri modoka izahita iba autonomous.

Ariko ibintu bimwe byatangiye guhinduka.

Umunsi umuntu azajya afungura app, imodoka ikaza kumutwara, akicara inyuma nta muntu uri kuri steering, ibyo bishobora kuba ibisanzwe nk’uko gutumiza taxi kuri telefoni ubu ari ibisanzwe.

Kandi ikibazo gikomeye gishobora kutazaba kikiri “Ese imodoka ishobora gutwara?”

Ahubwo kizaba:

“Ese twe twiteguye kuyizera?”